نجاح المدونة

يبدو ان المدونة بعد نجاحها قد احدث الرعب فى قلوب نواب المستقبل و ذلك لمدح الدمرداش و  محاولة اقناعك بالبقاء

و لكن لا اعتقد ان مدوناتهم ستظهر نظرا لانشغالهم فى ريكوستات تحضير الدم

وشكرا

قسم النسا : الريكوستات

قسم النسا : الريكوستات

ان الريكوستات هذه احد الادلة على قدرات الطبيب الطبية الخارقة

ريكوست تحضير الدم 

حيث سيطلب منك ان تاخذ تذكرة المريضة و تعطيها لبنك الدم لتحضير اكياس الدم ....اوعى تكون افتكرت انك هتحضر الدم بنفسك ....لا انت مجرد بتوصل الطلبية و عدد الاكياس و بعدين تيجى بعدها بكام ساعة تستلم الطلبية و ترجع بيها لقسم

الف مبروك اكيد اتعلمت جديد و هو سكة بنك الدم الخاص بالنسا او الرئيسى و احتمال تلف على بنك دم جراحة القلب و الصدر و تشحت الاكياس غير المتوفرة فى بنك النسا

ريكوست العيادة

هتاخد الحامل و تنزل بيها الى عربية الاسعاف و تاخدها الى العيادات فى مستشفى الباطنة و تسلم الريكوست لنائب ......هيعمل عليك عبقرينو و يسألك عن اشياء فى الحالة هو عارف انك لا تعلمها .. ويقعد يمسخرك و بعدين تتصل بالنائب بتاعك على موبايلك و يقعدوا يشرحوا لبعض الحالة و انت لاتعلم ماذا يحدث ....ثم يقوم عبقرينو بالرد فى التذكرة و توصل الطلبية لنائب بتاعك

قسم النسا : قصة تنظيف غرفة النائب العلامة

قسم النسا :قصة تنظيف غرفة النائب العلامة

طبعا هاحكى بعض القصص و الدراما اللى  مفيدة لاقناعك ان الدمرداش فعلا مش هتعلمك

وصلنا القسم الجميل و الرائع ... قابلت اصحابى و سلامات و اللازم ... وبدات الحكايات توصل .... النائب استغل واحدة غلبانة من الامتياز فى ترتيب الغرفة الخاص به

لا اعرف اسم هذه الطبيبة الطيبة التى تنازلت فى اول يوم عن دورها كطبية و عن دورها كعاملة امتياز و ارتضت بعاملة نظافة 

و لكن اذا كنت طبية و قال لك النائب ان تنظفى له غرفتك ...... فان اقل واجب انك تزعقى فيه و تهدديه بانك هتشتكيه لانه مش هيقدر يشتكى انك عايزة تكونى طبية مش عاملة نظافة 

اولا : كيف اختار المجموعة اللى هابدا بها

اولا : كيف اختار المجموعة اللى هابدا بها

طبعا انت ناوى تفضل فى الدمرداش و عايز تبلطج

لو انت ترتيبك حلو فى اول 400 : يبقى قشطة يا دفعة

قدم على المجموعة اللى بتبدا بالنسا

المجموعة دى الاوئل بالوراثة بيختاروها- السبب لا يزال مجهول و لكن حب التقليد غالبا هو المتهم

هتحس فى الاول انك غلطت و واقع مع شوية امواس بيمثلوا مشروع النائب السخيف القادم

الحقيقة : العيال دول اغلبهم غلابة و بيشلوا شغل طحن ...... يعنى اول خطوة فى التزويغ هتتحقق

طيب انت غلبان و مش هتيجى لك المجموعة الاولى ما تخافش : انت اصلا كنت بلطجى فى المذاكرة كمل بلطجة حتى لو مفيش اوئل معاك يغطوك فى اى مجموعة

بسم الله نبدأ

بسم الله الرحمن الرحيم 

نبدا اليوم سلسلة امتياز

سنه الامتياز بين التزويغ والبلطجه

وشغل الهمبكه
سلسلة تنورية فاضحة لمعسكر الدمرداش لمقابلة الاصدقاء

و هى سلسلة اكتب فيها خبراتى لزميل القادم الذى ينوى ان يبقى فى معسكر الدمرداش

و لكن الحقيقة ان من يبقى فى الدمرداش هو واحد من ثلاثة اما انه طيب يعتقد انه سيتعلم فى الدمرداش ....... او انه بلطجى كبير ينوى استغلال السنة فى الراحة الجميلة لمدة عام قبل بدء حياة الطب الطاحنة ...او انه لا يعلم ماذا يريد

السؤال ما هو الحل لطيب الكبير الذى يريد ان يتعلم طب فى الامتياز فى الدمرداش؟

الحل بسيط جدا اطلع برة .....برة الدمرداش ...............لانك هتشوف نائب سخيف اقصى احلامه انه يستغلك فى تنضيف القسم و انك تقيس حرارة المرضى و ضغطهم و تسجل النتائج فى ورقة حقيرة معلقة بجوار المريض و غالبا النائب مش عارف اصلا فائدة القياسات دى و لكن الرجل بيكمل ورقه علشان لما يجى استاذ كبير يبقى التهزيق خفيف و مش مركز

هتشوف نائب هو عبارة عن قصص ساحكيها يوميا على صفحات المدونة

السؤال الثانى : انا بلطجى كبير و عايز استريح السنة دى ؟

زميلى العزيز انك فى المكان الصحيح ستتعلم هنا اصول التزويغ والبلطجه وشغل الهمبكه

السؤال الثالث : ماذا لو كنت  مش عارف انت عايز تتعلم و لا تبلطج ؟
اقرا المدونة و هتوصل لحل فى النهاية و هتحدد هدفك
  

فالمدونة لها شعاريين و يمكن اضافة المزيد على حسب الامدادات العسكرية

سنه الامتياز بين التزويغ والبلطجه وشغل الهمبكه

النائب كائن ملهوش لازمة ,بيضرب بالجزمة ,و عايز يعمل على الامتياز ازمة . بس هنعلقه بلزقة